Rusiye prezidentiniñ vekili Kirill Dmitriyev dekabrniñ 2-nde Moskvağa kelgen ABD prezidentiniñ mahsus vekili Steve Witkoff ile körüşecek, dep bildirdi Reuters agentligi ABD ve Rusiye arasında muzakerelerge yaqın menbalarğa esaslanıp. Bu aqta Rusiye mediası, şu cemleden TASS devlet agentligi haber eteler.
Witkoff ve Dmitriyev barışıq tekliflerini ve ABD ve Rusiye iştirakinen yatırım imkânlarını muzakere etmek içün Rusiyede ve Amerika Birleşken Devletlerinde bir qaç kere körüşken ediler.
Dekabrniñ 2-nde Witkoff ve ABD prezidenti Donald Trumpnıñ kiyevi Jared Kushner Rusiye prezidenti Vladimir Putinnen körüşecekler, dep beklenile. Bu yanvar ayından Witkoffnıñ Putin ile altıncı körüşüvi olacaq. Kreml körüşüv saat 17.00-de olacaq, dep bildirdi.
Bundan evel Witkoff Amerika eyyeti erkânında noyabrniñ 30-nda Floridada Ukrayina eyyeti ile körüşüvde iştirak etti. ABD barışıq planı muzakere etildi. Eki taraf da körüşüvni konstruktiv dep adlandırıp, ilerilegenlerini bildirdi, amma tam añlaşmalar aydınlatılmadı.
Ukrayina prezidenti Volodımır Zelenskıy Ukrayina eyyetiniñ ABDdeki körüşüvlerden soñ "tafsilâtlı maruzasını" diñledi, dep bildirdi. "Rustem Umerov ve Floridada keçirilgen muzakere iştirakçileri Amerika tarafınıñ dialogdaki esas fikirlerini ayttı. İş Jeneva vesiqası esasında yapıldı ve bu vesiqa tamamlandı", – dep yazdı Zelenskıy, dekabrniñ 2-nde İrlandiyanı ziyaret etkende.
ABD devlet kâtibi Marco Rubio barışıq añlaşmasını tasdıqlamaq içün Witkoff Moskvanı ziyaret etip, Rusiye prezidenti Vladimir Putinnen körüşecek, dep bildirdi.
ABD teklif etken 28 maddeli ilk teklifi Ukrayina akimiyetiniñ qasevetini doğurdı. Noyabrniñ 23-nde Ukrayina eyyeti ABD devlet kâtibi Rubio ve Jenevada diger Amerika memurlarınen muzakereler keçirdi.
Bu muzakereler 19 maddeli plannıñ azırlanmasına yol açtı ve bir qaç müim meseleni, hususan Ukrayina Donbassınıñ bir qısmınıñ taqdiri, Ukrayinanıñ NATO ıntıluvı ve Kyivniñ silâlı quvetleriniñ sıñırlanmasını masada qaldıra.
